الحمار : أيه ياباشا سايبنى من صباح ربنا من غير أكل وقاعد تتفرج على التليفزيون !!
* معلش الحوار شدنى والأحداث نست الواحد أسمه ..
الحمار : أحداث أيه وحوار أيه اللى ينسيك " توأم روحك " ؟؟!!
* دا موضوع كبير عليك.. وخاص بالبلد والبنى آدميين .. فيه ثورة كبيرة فى البلد .. وفساد .. وفلول ..وأحزاب .. وبلطجه .. وأخوان .. وسلف .. موضوع مالكش فيه .
الحمار : طول عمرنا سوا ع الحلوه والمره.. ثورة أيه اللى تخليك تقولى مالكش فيه ؟
* أستعبط بقى .. يعنى انت مش شايف التطورات اللى فى البلد .. والتغيرات اللى بتحصل ؟
الحمار : أنا ما بشوفش التليفزيون .. أنا بتاع " الشارع " وبس .. قصدك يعنى شوية البلطجه .. وشوية الأشغالات اللى زادت .. والناس اللى مش طايقه بعضها .. والزحمه والفرهده وقلة الرزق .. والذوق .. والأدب !!
* أيوه سوق فيها سوق .. ماأنت أصلك م الفلول !! دى حاجات طبيعية بتحصل بعد أى ثورة ياغبى !!
الحمار : من غير غلط ..لما دى حاجات طبيعية أيه اللى شاغلك ومخليك بلهان ومحير حالك ؟
* الدولة مدنية والا دينية .. الدستور الأول والا البرلمان .. الليبراليين والا الأسلاميين .. الوفاق القومى والا الحوار الوطنى ..كاميليا والا عبير .. الفئوية والا المليونية .. فاهم والا حتوجع دماغى وخلاص ؟
الحمار : أنت عارف طول عمرى بفهمك .. بس انت اللى بتكابر .. عموما كل ده محلول .. بس حتسمع من غير غلط .
* اتفضل قول .. أفتى ياسيدى .. هى جت عليك !!
الحمار : مع ان ودانى راصده تريقه .. لكن حقول ورزقى على الله .
1/ أصدار مرسوم بعشرة قواعد دستوريه ملزمة " لواضعى الدستور الجديد " ترسخ للتالى :
مدنية الدولة وحرية الأعتقاد السماوى والمساواه وعدم التمييز . سلطة الشعب المطلقة فوق سلطات الدولة الأربعة وتحديد أختصاص كل سلطة فى مادة مع مراعاة " الفصل التام بين السلطات " و " الأستقلال التام للقضاء . وأضافة مادة للقوات المسلحة تمنحها الى جانب مسئوليتها فى حماية الوطن مسئولية " حماية الدستور " بحيث يمكنها التدخل لعزل أى حكومة تحاول اختراقة وأجراء أنتخابات مبكرة
2/ أصدار مرسوم بقانون " حماية النفع العام " لحماية المال العام والمنشآت والمركبات والطرق والمبانى العامة .. الخ . للتصدى بقوة للأنفلات الموجود مع تخصيص قوة من الجيش لتنفيذ القانون بشكل مؤقت . لحين استقرار الأمور .
3/ أصدار مرسوم بقانون جديد " للحكم المحلى " يعالج سلبيات القانون الحالى ويمكن من رقابة شعبية حقيقية وينظم علاقة المواطن بالأدارة المحلية ويسهل حصوله على الخدمات التى تقدمها . أظن بكده تقدرتبدأ عهد جديد والكل يعمل من غير قلق لزيادة الأنتاج ووضع قواعد الدولة الحديثة . ها فهمت والا أعيد تانى ؟
* فهمت طبعا .. بس فيه حاجات محتاجه توضيح .
الحمار : لا ياباشا الكلام ده يبقى بعد الأكل ..... قصدى التعليقات .
* ياه ه ه ه ه معاك حق .. حالا أجهز العليق !!!
حتى نلتقى ...... خ . م
والله الحمير دلوقت بتفهم بس مين يسمع
ردحذفنبيله
بس انت كده رميت الحمل كله على الجيش وفين الشعب مصدر السلطات دوره ينفذ وبس ولا يحاول يتكون له دور
ردحذففاطمه
كلام جميل جدا بس مين ينفذ ده ياريت تحاول توصلوا للمجلس العسكرى او رئيس الوزراء
ردحذفام مصطفى
ناقص قانون يجرم المظاهرات الفئويه اللى عطلت الدنيا ووقفت الانتاج ووقفت حال البلد
ردحذفوفاء
الله ينور عليك فين الكلام ده من زمان
ردحذفمنى
Eman karkora
ردحذفالكلام دا وثيقة عمل مع بعض الملاحظات
أولا الدولة الدينية ليس لها وجود فى الإسلام لكن عايزين رئيس جمهوريه مسلم يراعى الله فى الناس ولا ينتمى للإخوان أو السلفيين
ثانيا حماية النفع العام يحميها ناس مدنيين مكونين بقواعد وقوانين
ثالثا يبدأ اصلاح التعليم لأن دا اللى حيصلح البلد مع الوقت
كلام جميل جدا الله بنور بس عايزين شوية قوانين اصلاحيه تحسس الشعب بالتغير خصوصا فى التعليم والصحه والتضامن الاجتماعى وياريت تلاقى وسيله توصل الكلام ده للناس وربنا يوفقك
ردحذفسامح
هو حمار الحكيم اللى بيتكلم ولا حمار مين بالضبط كوثر
ردحذفاشكر كل من علق على أهتمامه وأعتزر لوقته ألف شكر..ولسؤال نبيله الحمير بتفهم من زمان ..ولفاطمة الجيش هو الآن الحاكم والمشرع.. وهو قدها ولأم مصطفى المهم الكلام يوصل لكوا ونكون بيه رأى عام " ننشر يعنى" ولوفاء المظاهرات الفئويه ظرف مؤقت .. ولمنى وسؤالها الكلام ده كان موجود فى الحزب الوطنى زمان !! ولايمان الجيش يحمى النفع العام مؤقتا لصعوبة موقف الشرطة ومينفعش مدنيين لازم سلطة.. وأنا معاكى فى التعليم تماما ولسامح أكيد بعد الدستور سيتم تعديل القوانين المكملة كلها والأصلاح سيتم بوعى الناس .. ولكوثر مش حمار الحكيم .. ده حمارى اللى غلب .
ردحذفشكرا لكم جميعا وأطيب أمنياتى خميس
كلام مهم جدا والله
ردحذفوتبقى حاجه كويسه لو يتنفذ اكيد
لانه اعتقد خلاصه حاجات كتير
من الاخر يعنى
واتقال الكلام وهل من آذان ؟؟؟؟؟؟؟؟؟؟؟؟؟
ردحذفمحمد رزق